隔牆有耳:黃埔站一片藍有讚有彈 - 李八方

隔牆有耳:
黃埔站一片藍有讚有彈 - 李八方

「黃埔,呢個係觀塘綫嘅尾站,多謝乘搭港鐵。」港鐵官方fb噚日上載多張觀塘綫黃埔站嘅站內相(圖),話市民好快可以聽到呢個新廣播。相片可見黃埔站主色一片藍,車站用單月台設計,分東、西兩個大堂。東大堂位於黃埔花園,西大堂就通向黃埔新邨同德民街,港鐵話車站進行緊法定檢測,稍後會開始籌備車務營運工作。
網民對車站以藍色做主色有唔同意見,有人讚「隻藍色幾好睇」,亦有人批評「死人藍色,好邪」,另有網民反問點解黃埔唔似黃大仙站用黃色?
當然最多人關注幾時搭得,當局預計港鐵觀塘延綫最快今年10月通車,日後取代油麻地成為觀塘綫尾站。而港鐵觀塘綫延綫包括何文田站同黃埔站,預計黃埔至太子票價5.3元,車程10分鐘;黃埔至樂富票價8.2元,車程16分鐘。