書展噚日開鑼，人海之中有位高佬書蟲好突出，攞住大大個旅行袋搜尋心頭好，滿載而歸前仲去咗搵《100毛》腦細林日曦簽名。邊個對書咁渴求？原來係法律界高登佬大狀石永泰。
雖則係資深大狀，仲要係前大律師公會主席，但石永泰冇得特事特辦，同普通市民一齊排隊搵腦細簽名，其實佢一向係《100毛》同毛記粉絲，難怪一次過買晒腦細8本著作，仲向傳媒笑稱毛記主播中至愛專家Dickson，貪佢夠「毒」，買埋對方嘅《愛情的二十二道陰影》支持吓。
唔通毒男唔睇正經書？八方唔會問，以免「悔」辱呢位陳冠中嘅粉絲。據聞佢同時掃埋中大出版嘅禁書《趙紫陽文集》，而沈旭暉嘅《解構中國夢》、蔡子強同安裕合著嘅《最壞的年代、最好的記者》及陳雲嘅《希望政治》，已經安然進駐佢嘅辦公室。