近季喺本地賽成績麻麻嘅南華，處理職球員去留嘅手法經常惹球迷劣評。佢哋噚日朝早喺fb出咗篇六百幾字嘅文，為今季港超聯棄用香港大球場，選擇留喺將軍澳運動場解畫，點知短短幾粒鐘已經有百幾個留言，大部份都係「負皮」，Angry同Wow加埋又過百，繼撲出嚟抽東方地震水後又一單「關公災難」。
死守將軍澳貪旺角場福利
我求大俠前晚上網見到香港飛馬話今季繼續用大球場做主場，已經覺得奇怪，因為飛馬上季聯賽排第五，按港超聯論排名揀主場規定，東方同傑志都用旺角場，咁三哥南華應該返去上季死都話要爭嘅大球場先啱㗎？仲記得大球場上季重鋪完草地，講明只可容納一隊做主場，咁第三位嘅飛馬又好奇怪咁揀咗大球場；當時南華足主張廣勇好唔滿意，話用開大球場咁多年，點解唔可以容納多一隊，仲搵足總同康文署開會爭取，最後都係要搬去將軍澳，入座率即跌兩成。點知𠵱家有得用大球場，南華竟然繼續留喺上半年要封場維修嘅將軍澳運動場，網民就話直頭係「今季的我打倒上季的我」。
南華篇文先將球市不濟推落「主客制」，之後話離開大球場後有機會審視球圈環境，結論係大球場只適合安排重要賽事，例如盃賽決賽、港隊賽事或外隊比賽：「大球場有40,000個座位，但本地普通聯賽只能吸引數百觀眾。以南華叫座力或有過千人入場，但這個入場數字在大球場就有如閉門比賽，顯得無法凝聚氣氛。」
但重中之重係呢段：「因為將軍澳運動場於九月至明年一月維修，主場比賽或可被安排在最適合進行本地賽事的旺角場上演，為時雖只半季，但起碼每場主場可望吸引三、四千觀眾以上。如果碰到重頭戲，如上次亞協盃八強對柔佛，旺角場掛紅旗是一個實質體驗。」係咪原來上半季可以去旺角場做主場，會有多啲球迷，所以就唔用大球場？
陳偉豪fb嘆係「笑話」
睇番洗板式留言，唔滿意南華棄用大球場嘅球迷佔多數，連正喺廣州隨隊集訓嘅隊長陳偉豪都喺fb貼文：「唔好停，繼續為大家帶嚟歡樂，準備迎接另一個笑話吧。」我求大俠搵過豪哥，佢話將軍澳做主場有好有壞；好處係較近地鐵站、場地質素亦唔錯，唔好就係同觀眾席隔得太遠，球員踢落冇氣氛，至於笑話一文就冇回應啦，球迷自己估吓啦。
網民點睇
Kelvin Leung：以前南華擺大球場都可以幾千人入場，因為以前南華踢好波呀。姓張嘅如果唔係盲嘅，麻煩睇吓上季南華踢咩波，少人入場唔好賴地硬啦。
Jackie Cheung：對祖記會有四萬人入場咩？改去將軍澳踢啦，氣氛好啲 呀。
Patrick Tang：你接管球隊之後入座率低，係因為你趕客。
Kan San：堂堂香港第一大球會，講到自己賣弄小聰明，頴到半年用旺角場，好叻叻。唉，冇啲霸氣，點會夠人踢吖。
Andy Fong：想慳皮咪直接講囉，講一大堆所謂嘅道理，無私顯見私。
資料來源：南華足球隊fb