又是一個有故事的女人。
56歲的余安安不整容，眼角天然皺紋；A4腰，卻有上下曲線。出道超過40年，身材樣貌卻和「香香公主」分別不大。三年前，安安一頭栽入舞台劇世界，憑《最後作孽》封劇后，今年更巡迴到內地。單親養育的律師長女今年結婚，即將升格索外母，人生進入收成期，「我諗我十年後同𠵱家分別不大，咁梗係老咗㗎喇，但都會繼續做緊戲！」
撰文：林妙萍
造型：林嘉慈
攝影：郭賢興
攝錄：陳志嵐
髮型：Yen of HAiR
化妝：小白
余安安專訪只能在周日進行，皆因她正在排本月尾重演的《最後作孽》，及九月尾與黃秋生、林德信合作的莎翁名劇《仲夏夜之夢》，密集式排劇，如同OL返工，一周五天半、朝十晚六。
中舞台劇毒
「一個新劇應有六個星期排演，今次當re-run，只得四個星期，但我哋演員同導演要求好高，想人物性格再立體啲，每句對白都研究，所以好似一輯新劇咁去排過，好認真！」每晚回家做功課，余安安希望將這輯反思金錢慾望與家庭關係的劇作，再發揮得更好。八月尾巡迴到天津、北京做六場，更會改成電影版本。
余安安憑此劇得香港舞台劇獎「最佳女主角」，她連呼三次「好開心」，「我唔係自己讚自已，但舞台劇真係一個難度好高嘅工作，當你做十幾場，每場都要保持住個狀態，真係唔易。」感恩找到人生的另一個新目標，「我唔係唔鍾意做電影，我一樣鍾意做，但呢幾年咁醉心，有一樣好實在嘅感覺，帶畀我滿足感同knowledge，我好珍惜！」台上最怕遇到行內俗稱的「焗蟹」，「我係一個好難忍笑嘅人，如果遇到有人蝦碌咗，咁我就死，一定爆笑，笑到停唔到！」
11月做索外母
初戀情人是爾冬陞、前夫有周潤發、李萬祺，過去的都過去，做人妻的日子早完結。余安安作為媽媽的日子，正進入幸福豐收期，任職律師的大女李文琪11月結婚，即將榮升外母。早前未來女婿上門向她求准許，安安晚上回想，忍不住喊了出來。「某程度上，好似完成咗一樣嘢，個女成家立室、嫁人喇，但感覺好複雜，真係會唔捨得！我都好矛盾，唔知點解好似有種脫鈎嘅感覺。」單親媽咪養大兩個女兒成才，「我兩個女都幾成熟，幾懂事，好識諗嘢，我一直唔係太擔心。」
十年後我會老
三幾年後60歲的余安安，實在keep得好，超窄A4身形女模才穿得下的Victoria Beckham高腰褲、性感corset，一樣照穿無誤；試玩古怪、露鳥的Rick Owens，她也奉陪。活在當下，享受精采，「十年後？我諗，我都係繼續做緊戲，同𠵱家唔係好大分別，除咗老咗十歲囉，哈哈，但生活上唔會有好大分別。」湊孫？「個女住得好近，都會去探吓，但唔係我主力囉。」
美中女 Dos & Don'ts
若要keep得好，運動必需做。余安安的心得，總括兩句：可以時而放任，但要懂得收斂。「第一係要做運動，我唔係今日先做，係持之以恒；我都會懶，可以幾個月都唔做，但懶到咁上下，就會做番。」飲食上，「我不嬲好為食，乜嘢都食，但我會就住，夜晚要應酬放肆一輪嘅話，下午個lunch會好light。」
Dos
1.多飲水
2.必搽防曬
3.心境要開朗
Don'ts
1.不落妝瞓覺
2.暴曬
3.暴食