【專題籽：港情講趣】
香港好灰。是破壞環境的惡果，還是白色恐怖的散播？兩本分別在書展及動漫節推出的本土漫畫，以世界級精細線條記下對香港末日的幻想。環保災難加上恐懼感染，香港仲有冇得翻身？喂喂喂，與其諗谷底反彈，不如阻止香港跌入谷底啦！
漫畫家蘇頌文（Pen So）首部繪本《香港災難》，好癲；如果我讚廢墟般的香港好靚，好似仲癲，不過你望吓嗰啲點與線，你會跟我一起發癲。「我這個年紀，可能很多人看日本漫畫，但我從小到大都喜歡精細的東西，看過馬榮成的《風雲》便迷上港漫。畫畫時都會學習港漫的『排線』及『風位』技巧。如果繪本我草草地速寫，讀者便要估畫中的地方係邊度，會阻礙理解。」
香港所有高樓、地標因地震冧晒，這是大自然的反撲，如果香港終將有這一天，都是我們的共業。Pen說：「我哋不斷破壞環境，大自然扯火就會造成天災。」受到日本《東京幻想》廢墟插畫集啟發，他試着把香港幻化成頹垣敗瓦。「畫咗一兩張，大家都幾鍾意，說未曾見過香港爛成咁，於是延伸成一個故事。」故事用第一身視點，令人仿似地震過後其中一個生還者，親歷其境。「讀者睇繪本時，好似執咗主角本畫簿咁。」漫畫部份角色放大了某些典型香港人特徵，包括災難中仍只顧打轉珠game的廢青，仲有要到置地廣場搶名牌手袋、打算災後賣掉的港女。或者你會笑，但最悲哀係呢類人充斥香港。
畫中的政府總部「門常開」、解放軍總部等一樣倒塌，是否有政治隱喻？「政府環保政策做得不好，所以也把門常開畫到爛晒，當宣洩吓。」可是爛到盡頭，真能否極泰來？「香港分化，但天災來臨，大家都會團結。」翻到最後一章，廢墟上生出一棵大樹，他信香港會有個光明的出口。
恐懼似病毒 議員都中招
同在7月以畫筆整死香港的還有原名謝燦光的謝森龍異，他笑謂：「唔整都死啦，咁樣行落去。我只係將香港嘅未來勾劃出來。」他的《香港感染》長篇漫畫，第一期將於動漫節亮相。畫中人疑似喪屍，原來另有所指。「佢哋唔係喪屍，係一群感染者，我會話係『怪形』。佢哋感染嘅唔係病毒，係恐懼。活喺恐懼中，係人生最大悲哀。」更諷刺是「感染」在立法會內爆發。「有影射政治人物，如tree gun議員。有啲遺憾，佢好似排第二梯隊？希望佢睇得開心啲，撫平吓佢囉。」他笑謂。
漫畫不折不扣地諷刺政治生態，但還寫雨傘革命？硬係覺得尾班車已過。「呢件事喺香港人心中應該好難忘記。經過時間沉澱，大家睇到更多政治面貌，反而見到更多真相。」漫畫黑過黑洞，但他堅持歌頌人性光輝。「係好老土，但要囉，市場上好缺乏。」黑吃人，但有種白一樣把人吞噬，叫白色恐怖。「我深信越被壓制，越多人想睇。」可能有後果，怕嗎？「咁到肉寫政治題材，係我第一次，有乜後果都要之後先知，但盡量我都唔會妥協。」當大家爭着向玻璃心經濟強國人民道歉，或者我哋先要學識唔妥協。「以前好啲，𠵱家差啲，大家有目共睹，唔能夠避而不談。」創作富有共鳴的寫實漫畫是他的堅持，「大家可以做嘅係堅持，堅持你就多一分力量。讀過歷史都知道，到最後一定會洗牌。」香港可能會置諸死地而後生，你又做準備好嗎？
記者：葉青霞
編輯：李寶筠
美術：楊永昌