同政務司司長林鄭月娥一樣好打得嘅影星惠英紅，最近憑一套電影喺第39屆亞美國際電影節攞獎，但唔係女主角或女配角，而係獲得2016年亞洲傳媒人道主義獎。
從影40年嘅惠英紅，喺以腦退化症為主題嘅新作《幸運是我》飾演一位嚴重腦退化症病人，佢同另一位主角陳家樂日前到紐約出席第39屆亞美國際電影節。大會指影片喚起當地華人社區更關心腦退化症帶嚟嘅問題，無論喺文化差異、語言障礙同社會資源等各方面都有正面影響，所以特別向紅姐頒獎，以表揚佢對腦退化症嘅關注。
56歲紅姐話多謝大會認同佢40年嚟喺影圈嘅小小成就，佢希望透過電影向同樣患認知障礙症嘅母親道歉，至今仍悔咎當年冇善待母親，「有少少似贖罪。」佢話唔介意票房多寡，最希望將片中訊息向社會傳播。