【本報訊】市場上專寫營銷的作家寥寥可數，《蘋果日報》執行總編輯徐緣除了是半個傳媒人外，亦是半個營銷作家。「我寫文章唔係想寫畀業界睇，好多人都誤會我係咪懶勁咁寫啲嘢代表業界，其實唔係。由頭到尾我寫作嘅目標好清晰，希望將我認為有趣嘅營銷及廣告介紹畀公眾。」
記者：張紫茵
今年書展，徐緣會推出兩本新書，一本《甜銷》，講Sex Appeal廣告；另一本《關公災難》是講網絡公關災難。「《甜銷》呢我想寫好耐㗎喇，原本諗呢條橋嗰陣想叫《廣告性經》，性係sex嗰個性，後期就變咗《甜銷》呢個名喇！」
至於點解會有《甜銷》這個概念呢？徐緣解釋，這個題材雖然冷門，但Sex Appeal這個廣告形態好常見，美國有一本書叫《The Erotic History of Advertising》，正正是講美國色情廣告史。Sex Appeal廣告內容不一定咸濕，例如廣告用靚仔或靚女賣衫，都屬於Sex Appeal，惟華文世界無咩書講這個題材，所以他就根據外國書籍作為藍本，再加上東方元素，如清初民國時期的廣告，成為今日出版的《甜銷》。
他笑言，以前廣告比現今更開放，例如電力公司呼籲「節約用水」的單張背面，竟然會是性感裸女浴照，尺度大到要打「馬賽克」！此外，《甜銷》書頁內亦有大量性感圖片，記者搶先睇時已經見到好多「馬賽克」，真係少少甜多多趣！
睇完甜嘢，可以食住花生介紹另一本新書《關公災難》。社交媒體興起，人人也可以當名人，不過時時都有公關災難發生。徐緣就澄清，「呢本書唔係用嚟鞭屍，好多時有呢啲嘢發生都俾人恥笑，新書唔係咁想人用嚟恥笑，想大家從錯誤中學習。」
書中亦主要講及關於個人的關公災難，普通人一段出位言論、寫一篇好多人share（分享）的文章，又或者一張圖、一段直播就變了公眾人物，成名門檻越來越低，部份人根本未預備好、唔知點做名人，就好容易出事。有趣的是他在資料搜集時，發現即使外國的關公災難與本地有高度相似性，所以佢覺得，《關公災難》可以話係網絡紅人避免「關公」的自救手冊。
談到最近睇緊咩書，佢就話狂睇有關「內容營銷」的書。「呢個周末睇咗六本書，因星期三書展有個talk講content marketing（內容營銷）！」徐緣指亞馬遜上10本有關的書籍都睇過晒。明明一本書講Sex Appeal，一本講關公災難，但偏偏今次講座就是不談這兩個話題，走去講「內容營銷」，到底內容營銷同兩本新書有咩關係呢？我唔知，你自己去聽下啦。