【本報訊】踏入7月，除了天口熱辣辣，港股都炒到興烚烚，恒指破埋今年高位喇！有專家認為，牛市一期已經開始，書展想買啲投資書惡補下技術分析，可以留意下呢本《買對獲利點》。
作者盧駿匡（Chris Lo）是興證國際證券副總裁，今年雖然第一次出書，但過去一直有幫各大報章雜誌寫專欄，主要是以技術分析為主，他認為坊間書本的技術分析已沿用多年，所以自己研究了一套技術分析模型，揉合一些特別指標，去找出訊號及趨勢。「例如將RSI、MACD加上成交量的分析去搵個訊號出嚟買賣，就係本書嘅特點。」
他認為，「本書最重要幫大家找到短炒、爆升股份，當中有不同方法去炒大價及細價股，當中除了文字以外，亦會有圖表及圖畫指出訊號，大家如果細心研究的話，睇完本書應該唔難搵到爆升股。」基本上文稿是來自過去專欄再修定，但他認為講技術分析用純文字較難消化，所以今次加入圖表，畫好訊號出現的位置，讓讀者更加清晰。
對於過了大時代才出炒股書，盧駿匡認為：「個市太旺反而啲人會無心機研究，淨係掛住炒股，反而現時港股穩步上升，會係一個合適嘅學習機會。」大廚上身的盧駿匡笑言，「今次呢本書以方法為主，如果以一碟菜式而言，今次係教你點炒好一碟菜；下一本就會教大家點揀餸，例如青椒、蕃茄，就會係下一本書嘅主題喇！」