【香港書展2016】昨日書展開鑼，何韻詩亦有開檔宣傳自己的旅遊書《接近獨行》，跟粉絲見面兼舉行簽名會，攤位內同時有密友鄧九雲及專欄作家畢明的著作，都是經阿詩代為發行出版。阿詩表示坊間對新書反應不俗，除了自己的一班粉絲外，亦有不少街客讀者買書。
諗方法自己發行
阿詩透露平時要找大出版社出版，在書局賣書的方式很有難度：「我哋呢啲寫題材比較敏感嘅，或者我個人又比較敏感啦！所以倚賴大書局出書係有難度，上年自己親身有呢個經驗，遇到問題，後來諗方法自己發行出書，其實只要願意做，係有好多方法可以出發嘅。無論演唱會定出書都好，大路行唔通咪試吓其他方法，睇吓行唔行得通，𠵱家有網絡世界，我覺得想做一啲嘢比以前容易。」
畀自己一個沉澱
至於書的內容，其實除了阿詩本年初到了北歐幾個國家外，就只有印度，她解釋：「除咗休息，𠵱家環境咁亂，有時會諗埋一邊，所以有時要拉遠啲去睇所有嘢，令自己冇咁衝動，𠵱家成個社會好多情緒氣氛出現，就會鬧嚟鬧去，尤其我係一個好大嘅箭靶，人哋會向我射箭，我要點去應對呢？都好考我嘅智慧，喺呢一個月旅程入面，係畀自己一個沉澱，對我再返香港好有幫助。」
採訪、攝影：卓寶花