曾啜爆陳冠希（Edison）嘅𡃁模謝芷蕙（Cammi），兩人甩拖後，Cammi喺3年前撻着內地富二代B先生，男友教做生意，Cammi近日儲足彈藥，斥資6位數字喺荔枝角開時裝批發店，大賣自家品牌，索性退出娛樂圈。
店舖細細面積只有200多呎，卻有近百款服裝，Cammi話：「六成貨由我設計，男友屋企做時裝，佢舊年喺廣州開咗零售店，我想喺香港賣批發，利潤唔高，志在散貨，一件賺唔超過10蚊，店中最平嘅衫賣20幾蚊，最貴百幾蚊，買5件就有交易。」Cammi話最近有本地連鎖店嚟入貨，新店開業一個月就收支平衡。
後悔影性感相
升呢做老闆娘嘅Cammi，唔敢進一步做埋人妻，21歲嘅佢話最快3年後先結婚。事業愛情兩得意嘅Cammi，懶理舊愛Edison被爆戀上被指未離婚嘅內地超模秦舒培，Cammi話：「唔關我事，做好自己。」Cammi話後悔做𡃁模影性感相，對於仍擁有刀削臉，佢話：「冇再打針，嗰次後唔敢，我眉頭皺到㗎，可能係我箍牙。」
撰文：馮仁昭
