女星最怕撞衫，公司最唔鍾意撞名！一線內險股平保（2318）有個幾分相似嘅行家，叫平安證券（231），望清楚，佢哋連股票編號都只差一個8字。
查實呢隻「231」前身叫做「盛明國際」，舊年用12億元收購1970年已經喺香港做生意嘅平安證券後，就跟手改名，令「231」變成港產平安證券。
平保當然唔多高興喇，事關平保自己都有間平安證券，一早話要分拆做H股上市，俾人搶先一步用咗個名，情何以堪，佢哋之前已經出晒律師信，話「231」影射佢。香港公司註冊處似乎亦企喺平保嗰邊，處長6月底根據《公司條例》，要求「231」兩個月內要改名。
不過，港產平安證券本身有成40年歷史，係咪真係要為此改名呢，大家可以買定花生了。