新季除了增加五個賽馬日外，獎金亦有增加，對於騎練甚至馬主而言，一定係好消息，而歷來贏獎金最多五駒，紀錄遲早被打破！咁到目前為止，贏獎金最多嘅馬係邊一匹呢？
答案就係賭王何鴻燊愛駒「爆冷」，總共贏過13場頭馬，包括07及10年女皇盃，06、07及09年遮打盃，08及09年香港金盃，仲有06年香港打吡，總獎金高達八千三百萬港元，唔敢話後無來者，但如此成就一定前無古人！
排第二係「爪皇凌雨」，總獎金高達七千五百萬，最重要錦標當然係07年司馬經典賽，亦係同年香港金盃盟主，又勝出05年香港盃。於04至05馬季，更一口氣攞到打吡、女皇盃及遮打盃三場一級賽，唔講得笑。
第三位係現役馬「軍事出擊」，最高成就要數到12至13馬季，先後贏得香港金盃、女皇盃及新航國際盃三場一級賽，目前獎金高達六千三百萬港元，但由於年事已高，要打破「爆冷」紀錄機會微乎其微。而現役最高分馬黑衣巨人「步步友」總獎金5,743萬，不入前五名。