打工仔總會有一個強積金戶口，轉過幾次工，又冇整合成一個戶口嘅，就可能會有幾個戶口，不過，積金局機構事務總監鄭恩賜噚日出席論壇時透露，最誇張嘅係有人有30幾個戶口！
擁有30幾個強積金戶口係一個咩概念呢？即係代表嗰位仁兄可能轉過30幾次工，而咁啱每份工嘅僱主都係聘請唔同嘅強積金公司，計埋強積金誕生15年，呢位仁兄要每半年轉一次工，又冇整合，先至可以做到。
香港地，斷估好難有咁多巧合嘅事夾埋發生啩。鄭恩賜估計，嗰位仁兄應該係業內行家，透過開設30幾個強積金戶口，追蹤同業搞緊乜咁啫。華華就覺得，佢係想偷師，觀察同業點樣管理打工仔嘅戶口，電子平台做成點，夠唔夠user-friendly咁囉。