今屆立法會選舉，除咗地區直選爭崩頭，打到七國咁亂外，泛民搶攻幾個功能組別都係選舉焦點之一。其中一個有睇頭嘅界別，相信係建築、測量、都市規劃及園境界，除咗現任屬建制陣營嘅謝偉銓擬競逐連任，仲有個本身係全國政協委員嘅建築師學會前會長林雲峰加入戰團，而泛民呢邊就有中大地理與資源管理學系前副教授姚松炎（圖）出戰。
姚松炎噚日就正式報名參選，原來撞正佢52歲生日，不過選舉邊有得唞，報名前競選團隊買件蛋糕畀佢食就當慶祝喇，佢自言呢排少咗陪屋企人，所以生日都要陪家人食餐飯。佢就諗吓計盡量寓工作於湊仔，有時出席導賞團、講座等都會帶埋11歲嘅囝囝一齊去。