書展今日開鑼，之前出版《政治化妝大拆解》講解政治公關嘅中大政治與行政學系高級講師蔡子強，今年冇出香港政治書，反而趁書展推出佢嘅新作《大人們的餐桌》（圖），環繞歷史領袖政治人物嘅餐桌上菜式、餐桌上嘅趣聞軼事、以民間美食作為外交手段等嘅小章節，其中包括拿破崙、希特拉、奧巴馬同佢老婆等等。
蔡子強喺書嘅序話，餐桌上蘊藏豐富嘅政治學問，既可觀人於微，也可以傳遞含蓄、微妙嘅政治訊息，亦可睇到社會變遷，甚至可以將食物融入治國方略、政治論述之中。呢本書由台灣嘅時報文化出版社出版，所以部份譯名會用台灣譯法，今次亦會喺時報嘅書展攤位賣，過咗未必咁易買到。