練馬師沈集成勤力過牛，大部份同僚仍休息未現身之際，成哥已經連續兩日親自落場操馬，當正就快有賽事舉行咁。這天佢主試「琪麟穎」、「健康歡笑」、「好運有利」，喺機坪踱步，為啲馬舒展筋骨，其中最值得留意嘅，當然係「琪麟穎」。
一來今季復課兩日，「琪麟穎」都係由沈集成親操，明顯非常重視，二來此駒上月底仍在葉楚航馬房，因左前腿不良於行退出賽事，7月5日才拉倉，咁快可以復課喺沈廐勤做工夫，可見健康狀況理想。
「琪麟穎」公認實力有餘未盡，經常喺陣上交出超強後勁，包括曾與惡馬「太陽喜喜」串Ｑ，「太陽喜喜」之後再取一冠一亞，已升到89分，「琪麟穎」家陣只73分是否有大利，沈集成當然心中有數，難怪今季一復課即摸實，相信隻馬好快就可以為佢省靚招牌。