一年一度去曼谷，今次選咗文華東方酒店入住。三十幾年來到曼谷，多數住喺先先叫做麗晶，後來叫做四季，去年初又改名做Anantara（安納塔拉酒店），新名稱唔容易記，去年改名後入住，發覺服務水平與餐飲水準（以早餐為例）都有少少下跌，雖則新業主係幾十年朋友都係咁話，新住客未必會察覺到，但左丁山由麗晶年代住起，自然有感覺，就係一蟹不如一蟹。
文華東方位於湄南河畔，由小巷行出嚟就係大街石龍軍路，永遠交通擠迫，五十年如一日，是故住在文華東方雖然有「地址優越感」，話俾曼谷商務朋友聽：「我住在奧良汀」，對方會覺得你「有料到」，面子威威，但實際上成日在出入交通上浪費時間，失去公幹時效。放假偷閒就無所謂啦，在呢間古老名牌酒店睡覺食嘢游水，唔出街都可輕鬆暢快過一日，記得約在1986年，住過文華東方一次，估唔到重臨已是30年後。
文華東方今年慶祝成立140年，原來舊址稱為Authors' Wing，以紀念Somerset Maugham，Joseph Conrad等著名大作家曾為酒店常客。既有咁耐歷史，員工當然有大把元老之輩，我地到達之晚（國泰誤班兩小時，赤鱲角起飛又要排隊半小時），已係香港時間晚上十一時後，幫我地登記入住嘅似係一位長者，首先問佢如何「登入」酒店Wifi，佢幾乎面有難色，不過都解決到問題，這年頭，老人若不與時代並進，時刻學習新潮流科技，好難唔被淘汰，見到人，諗吓自己，真係要時刻記住：「苟日新、日日新，又日新」呀。上到房，有一位女士招呼介紹房間設施，佢話係五樓管房（butler），本應已下班，但因我地遲咗兩個幾鐘頭入住，故此唔放工等埋我地，呢啲服務精神實在冇得彈，如非忠心老員工，點會咁負責任呀。住咗幾日，覺得文華東方嘅服務實在好過Anantara太多，樣樣做到十足十，令住客feel at home，只是還有一樣可彈之處，每日嘅自助餐就差啲啦，比起昔日四季，差起碼兩皮，量與質都不足，尤其是中式早點嘅小型叉燒包，蝦餃燒賣，及所謂叉燒雲吞麵，幾難入口，完全配唔起文華東方呢個金漆招牌，西式pastry及麵包與相距不遠嘅曼谷香格里拉一比，又係差兩班，但價錢係1150銖加一加17%稅，一家大細來此吃早餐，就物無所值咯。