會喺新界東立法會選舉同李梓敬拍住上嘅田北俊，噚日喺自由黨創黨主席李鵬飛親臨打氣下報名參選，希望連取兩席。田少登場，田毛毛又點可以偷懶？田少仲獻出從政第一次，搞fb Live宣佈爭連任。
田少喺短片自嘲被田毛毛「點」去做新嘢（嘩，田少都敢點，名副其實田生毛），佢喺短片中除咗講解參選原因，表明ABC外，仲不點名話有個行會成員特首又想做、港島又參選、新東又想有代表，似乎矛頭指向新民黨葉劉淑儀喎！
八方唔知葉劉新愛將、喺新東出選嘅小花大狀容海恩點接招，只知田少今次既緊張又興奮，始終選舉試過無限次，fb Live就真係人生第一次，唔知效果如何，叫粉絲上佢fb畀啲意見。佢喺片中仲話李梓敬嘅囝囝，靚仔過老竇㖭喎！