傻嘅？低能？死好運？識做人？乜都唔識做、乜都唔使做、乜都冇做……？
不瞞你，也沒什麼好隱瞞，以上評語不過滄海一粟，再難聽的惡言諷刺他都聽過，只因名氣大，卻沒有利用到搵錢搵到數唔晒，也沒建立星級名氣圈子護身加持，真係冇L用，完全嘥Q晒！
不熟悉他的人，循着名氣脈絡尋來，以為好打得，表面功夫打遍天下無敵手，誰知埋得身來跟社會大眾眼中的大師風範未免相去太遠！不是不打得，着實非常打得，只不過沒有修橋鋪路渡身邊打主意的族群名利雙收。
如無意外不擺款，架子不是不想擺，只因霎下霎下霎戇少年時打入功夫圈，迅速上位成名，怕埋堆，其實沒有特別拒絕一個又一個意欲教他名成利就Tatler路，想從旁得着數的圈子。並非天生智慧、心水清，曉得金鐘罩自保。偏遠地區來者兼滿口鄉音，習慣多見鳥獸游魚樹木少見人倫；選擇間歇性斷片，避開人群，遊山玩水尋靜去。
其他大師被前呼後擁變身明星；訓練呢個天后矯健身手，教那個有錢佬強身健體有心有力，所有乜Ball物Ball，首映國慶酒會列席，媒體捧為國師有事無事請示，就好似不久前英女皇大壽，阿邊個邊個大師準確批命，指出前事頭婆伊利沙伯二世一生無休，衣食不斷榮華富貴，大家即時清醒過來……嘩！乜咁準？真係準！阿邊個大師咁耍家嘅，咁都算得出？
大師告老歸田，回鄉返老家，雖然高鐵去到那裏，那裏有發達日子，大江南北一天之內幾線牽，字典裏頭不再有偏遠。閒着無事，避開無聊開間小飯堂，做得小小聲色……這情況，給我構思變身立竿見影。去年跑去扣門問路，大師從來簡約直接話語引導：
開個把小小連餐廳都稱不上的飯堂，原來半點不簡單。當年無端端入老本行只為搵食，誰知被捧、成名，猶似未動過半根手指頭，走出街，透過電子媒體人人認得，聲聲師傅。未幾升級，更被稱大師，初期非常不習慣，人家一叫，即雙手合十、回應：阿彌陀佛！
大師問：你有冇Partner先？
冇，仍有生機。
有，幾乎肯定死梗。
就不死，也耗費九牛二虎之力勉強Fight個吊鹽水、半生不死。
細佬，做食，豈止搵食咁簡單？
廚房有氣味有廚餘，引來曱甴老鼠烏蠅是明，引得暗地裏的人性蛇蟲鼠蟻才真的叫你搵食艱難。
（二之一）