【本報訊】「贏在射精前」象徵過份望子成龍的父母，成為主流教育夢魘，今年書展有媽媽著書抗衡病態教育。港姐麥明詩母親分享「十優港姐是如何煉成的」，有教師媽媽控訴教育制度崩壞，也有媽媽毅然放棄讓子女上幼稚園。放暑假，讓孩子放下功課重擔，也是時候讓家長們反思教育意義。
記者：袁楚雙
十優港姐麥明詩擁有劍橋大學法律學位，哥哥麥明山是醫生，兄妹前途一片光明。其實兩人母親麥何小娟，都是人生勝利組，本身任職業治療師，還有一堆名銜，「我做咗（教育工作）成30年，一大學畢業已經做，喺澳洲修讀過2個碩士課程，一個係教育碩士，一個資優教育文憑課程……」
稱女兒曾遇無數失敗
新書《我的女兒麥明詩》解答不少人對「麥明詩是如何煉成的」的好奇心，新書副題「一張白紙到10優的培育經歷」，不過麥太稱從無特訓女兒，考到10優是意外，「我冇特別希望個女第時點，我自己覺得應該咁樣教嘅（就咁樣教），所以佢細個我冇陪佢讀書、溫習，從來冇，佢做完功課我從來都唔check（檢查）」。
「好多人可能一優兩優都冇，（或者）得幾分會考，但都好成功。有啲狀元打後如果做得唔好，際遇（影響），都未必有成就」。女兒被指贏在起跑線，麥媽媽為明詩抱不平：「佢之前有無數失敗，好多人唔知咋嘛。」
她又說，有好多人對麥明詩感到好奇，想知她如何成為會考狀元、為何有名牌法律學位又跑去選港姐，「如果我分開咁多次答，不如我一次過喺書中解答」。
麥太新書有滿滿的理論，育兒心得分為培養孩子基本能力（如專注力、創造力）及性格（如面對逆境智商），結合她的理論與培養實例：「例如有時坐巴士唔係呆坐㗎嘛，你可以同佢傾偈，『有咩係圓形呀？』呢個係發散式思考……」
她對著作充滿信心，因自己教育經驗豐富：「我遇到嘅細路係過千到過萬（個）。所以我嘅接觸面係同一般家長唔同。」是否看完這本「十優育成天書」，就有機會「十優培育」成功？「我覺得係可以」。
