噚日沙田政府合署好熱鬧，皆因報名參選立法會嘅團隊一個接一個，而最早到嘅民建聯葛珮帆博士（EQ）團隊可謂人強馬壯，聲勢浩大。睇佢哋造勢造到要霸咗三分一條馬路，就知最巴閉！
八方噚日朝早10點幾去到沙田政府合署，已見到一片旗海兼人海，目測逾百民建聯中人為EQ造勢，但支持者越企越出，最後索性霸晒政府合署對出馬路其中一條線，嗰個位主要俾人落車，由於已經被民建聯「佔領」，其他車被迫停喺隔籬線落客，而造勢期間經過嘅車為避開人群，都係踩住雙白線駛過。而在場採訪嘅傳媒要拍到好鏡頭，惟有企晒喺馬路中心啦，好在嗰度唔算多車，但駛過嘅車都唔少狂「砵」以示不滿。
現場嘅警察就數度提醒幾次叫佢哋上返行人路啦。原來人多，有時未必好㗎喎！