【本報訊】為口奔馳，多100元日薪，你可以去得幾盡？「早更600蚊日薪，夜更700蚊，但好話唔好聽，我怕好似阿木（陳木完）咁冇命享」。行內持特別車輛牌照的職業女車手，一隻手數完，育兩子的單親媽媽陳樹嬌是其中之一。她直言錫身，寧願賺少一點都堅拒揸夜更。「夜晚條路真係好恐怖，試過喺高速公路，離遠見架車飆埋嚟反彈出去，好似睇戲咁，唔撞死都嚇死」。她慨嘆死者陳木完去年底在錦田遇意外，同行箭嘴車司機死亡，他逃過一劫，事隔大半年卻魂斷公路。
「着晒反光衣都好危險」
升斗市民，夜晚回家見到工程車封路，有時忍不住埋怨，但對於冒險工作的馬路工人和司機來說，卻不是遲了一陣回家這樣簡單，而是生與死之間的博弈。據業內人士指，修路工程多深宵進行，是為免工程延誤日間交通，但基本上承辦工程的公司24小時運作，除了總是孖咇出現的工程車和護航車，還有農夫車和掃街車，車種不同，各司其職，司機通通需經公司保送考牌，並需有豐富駕駛經驗。
「做我哋呢行最緊要夠大膽，好多市民唔知，農夫車負責清理道路垃圾，大到車輛殘骸，細到個煙包都要執，貓屍狗屍固然執過，連蛇屍馬騮屍都有。有時輕微路陷都要跟手做埋，你諗吓，喺高速公路落地，就算着晒反光衣都好危險，但要生活，有乜辦法？」做了7年工程車司機的陳樹嬌直言，兩個仔已長大成人，捱過最艱難時間。「呢間公司冇誠信，試過唔夠人叫你嚟幫手，講好600蚊一日都可以臨時減價，呢啲你要寫，真係好無良」。戴着頸箍的陳樹嬌說。
■記者呂麗嬋