香港眾志主席羅冠聰噚日報名循港島區出戰，攞到400個提名，實力不容忽視。八方卻發現，唔見咗導演舒琪（圖）嘅？眾志喺4月成立典禮上，有透露過舒琪會下海為聰聰抬轎㗎喎，忽然間無影，唔通事有蹺蹊？
八方問過舒琪，佢證實唔選，但大家唔好多心，因為一切都係因為時間唔夠。𠵱家係演藝學院院長嘅舒琪話，同校方合約至8月31日，由於唔可能喺呢段時間投放太多時間落選舉，加上見到聰聰至今選舉工程做得唔錯，「我排咗隊都未必對佢有幫助」，最終決定唔選。
雖然唔排隊，但舒琪話佢都係聰聰嘅助選團成員，一定會幫佢。至於民調顯示聰聰喺港島支持度大落後，佢話結果只能作參考，一嚟調查嘅名單唔完整、二嚟好多團隊亦未發力，「似乎個調查結果唔多似樣」。