「人工包埋」係打工仔用嚟自我安慰嘅心聲；但好似中超上海申花嘅塞內加爾前鋒丹巴巴亞，周日喺打吡戰恐怖斷腳，至少休息八個月，都要配合國內領導做場大龍鳳，真係睇住670萬美元年薪先忍得到。
懶理傷勢卧床問戰果
相信唔少球迷同我求大俠一樣，周日晚書面洗晒版，唔少國內外媒體報道上海申花對上港嘅打吡戰，31歲嘅丹巴巴亞下半場64分鐘同上港隊長孫祥碰撞，但係落地唔好，搞到左腳脛骨骨折，恐怖程度拍得住當年法國前鋒施斯、英格蘭中場阿倫史密夫嘅斷腳鏡頭。
巴亞係踢過車路士嘅英超兵，15年由比錫達斯轉投申花，先發現中超設施咁流，當時軍醫入場先知冇急救用氧氣樽，救護車亦入唔到場，搞超過八分鐘先抬離場，送去當地醫院。
嗱，中國每逢發生災難，都拍領導探訪兼鼓勵嘅鏡頭。話說周一朝早，上海副市長趙雯到醫院探巴亞，奇怪在巴亞經過一晚休息，仲着住申花波衫，呢個宣傳真係多咗。巴亞周日晚返到醫院後，即時唔係問傷勢，係問戰果，申花呢場打吡戰以2:1勝出，佢當堂開心晒。做戲做全套仲有上港嘅孫祥，周一朝早亦探望巴亞，話完全冇心之餘，亦希望佢盡快康復。
據報巴亞左腿脛骨腓骨完全骨折，申花高層話搵全國最頂尖嘅醫生，但巴亞話希望可以返法國醫，如果飛唔到都希望搵法國醫生開刀。佢咁樣傷害中國人民感情，小心要好似日籍女星水原希子咁拍片道歉。不過好彩佢同申花簽咗三年約，總值2,000萬美元，好唔返都夠退休。
