立法會上周五收爐，主席曾鈺成卸任唔再撈，咁仲有乜好做？似乎仍有好多路數。曾鈺成喺facebook上載圖片，見佢企喺木梯上髹漆（圖），乜屋企大裝修，自己親自出馬？NO，原來佢參加咗家居維修義工服務，為獨居長者翻新牆壁。
無論曾鈺成髹得幾落力，大家關注嘅始終係佢選唔選特首。公務員事務局前局長王永平（平叔）就喺報章專欄撰文，以曾鈺成正式英文名TSANG YOK SING玩anagram，將之拼成SO STINKY GANG，意思「非常惡臭的一幫人」，然後話若要喺HUGELY CUNNING（眾所周知講緊CY！）同SO STINKY GANG之間選擇，係咪一如諺語所講"between the devil and the deep blue sea靱，即係進退兩難，似乎曾鈺成並唔係平叔杯茶。