這天係新一個馬季開操大日子，晨課焦點係有新見習騎師登場，就係蔣嘉琦的師弟22歲的巫顯東。
巫顯東獲得香港馬會發牌，將喺9月3日新季開鑼日起，首次在港出賽。這天係東東自新西蘭學藝習騎返港後，第一日喺香港操馬，佢嘅師傅練馬師沈集成，安排了六駒畀徒弟出試，分別是「多多囍」、「發明小子」、「追風追月」、「放下自在」、「快樂寶貝」及「我是高手」，身形紮實的東東喺鞍上操控得宜，表現輕鬆，睇嚟佢嘅狀態唔錯。
由於沈集成好忙，巫顯東操完馬，只單人匹馬行出嚟讓記者拍照，而見習生不可私底下接受傳媒訪問，所以巫顯東只簡單表示今朝操馬感覺良好，會一直留港努力工作，希望開鑼後交出好成績。
至於沈集成其後指出，巫顯東是他第一位徒弟，之前向馬會申請接收見習騎師多年，如今終於獲批，當然會盡本份好好培育及支持東東。沈集成話在跑馬技術和體能方面，騎校校長陳念慈和教頭高雅志，都會教導巫顯東，所以他主要的職責，就是向東東給予座騎，以及教導馬房知識，會要求東東聽教聽話。
在騎功走位方面，沈集成話建議東東狂煲冠軍騎師莫雷拉的出賽影片，因為雷神是他在馬圈多年所見最勁的騎師，除了騎功非凡外，有時都不明白雷神點解可以神奇地楔到靚位，真係好勁，所以已多次叫東東向雷神偷師。