今屆立法會選舉，認真精采，除咗有P圖P到變大美人嘅李偲嫣擬戰新界東，形象不時令人耳目一新嘅黃夏蕙，都話有意喺港島區出戰喎。不過佢似乎上香叻過選舉喎，未搞清楚立法會選舉地區直選分5區而唔係區選咁有18區，所以話要喺灣仔選。有網民就建議佢改戰九龍東，覺得年年喺黃大仙爭上頭炷香嘅佢，求得神多一定有神庇佑喎！
唔知直選分5區
現年85歲嘅夏蕙BB若然參選，極可能係最高齡嘅候選人，之但係選舉不分年齡，有志者事竟成。夏蕙姨噚日凌晨喺facebook貼文，話如果真係要參選，「我空降灣仔區」，有冇人願意做佢提名人？政綱就只講民生，「因為國以民為重；民以衣食住行為先」，又話「講咁多政綱，做唔到就無謂啦，係唔係？」
有網民發現佢一個po有三錯處，首先立法會選舉冇灣仔區，同時將「提名」寫成「堤名」，「衣食住行」變「衣食往行」。當然，若然堅去馬，以上只係小瑕疵。八方問過夏蕙姨，佢話真係考慮緊㗎，仲話有好多政綱㖭！至於fb錯漏百出，夏蕙姨都冇唔認，直認段文係佢寫嘅，「我諗我住喺灣仔，有office，喺嗰度做就好啲，灣仔區係我地頭，熟絡啲。不過選區呢啲嘢，我唔係好叻」。
今屆參選人相信都會被問及，支唔支持梁振英連任？夏蕙姨就話好難講，但亦指CY做得唔錯喎，「我真心話，佢唔曳，佢可以留低，我畀佢80分！」查實呢，立法會都俾人感覺吵吵鬧鬧好似動物園，每年以應景生肖扮相去上頭炷香嘅夏蕙姨，相信都會適應立法會嘅「生活」啩！
李八方
mailto:[email protected]