有別於𠵱家拉布點鐘嘅年代，喺2012年同議會Say Goodbye嘅教育界前立法會議員張文光，至今回味自1991年結緣嘅從政時光。因為無分左中右陣營私下可以有偈傾，佢90年代就不時同黨友及其他議員到「酒仙」黃宜弘大宅，摸住酒杯底風花雪月兼談香港大事，𠵱家此情此景好少見。
查實當年如果唔係司徒華，張文光未必走上從政路兼識到呢班朋友。62歲嘅張文光自細讀書成績唔錯，但係好百厭，初中時喺校內見到大哥哥玩啤牌賭錢，貪得意跟隊買咗一毫子，結果老師殺到掃場，佢當堂被捉住兼被踢出校，「嗰晚唔敢返屋企，喺街度磨到好夜」，但醜婦終須見家翁，佢話阿媽聽到好傷心，卻冇藤條炆豬肉，只係叫佢去搵學校，嗰刻覺得好對唔住屋企人，從此發憤做人。
張文光之後逐間學校拍門，因為佢成績確實唔差，終於有學校收留，畢業時仲獲評為「品學兼優」，最終可以入讀中文大學新亞書院社會科學系主修經濟，「嗰時貪中大喺馬料水，風光如畫好靚，冇話特別有乜志願想揀邊科」。
多得華叔入政圈
大學時掛住搞學生運動，因為金禧事件識到華叔，畢業後華叔邀請佢做代課老師，「華叔話：『你咁窮，做唔長社會運動㗎，你嚟我學校代吓課，賺啲錢先至生活到』」，最終佢代課變長工，正式執教鞭兼入埋政圈。