夏日炎炎，ViuTV選美真人騷《美選D.n.A》嘅其中4位佳麗，包括「F Cup紋身女」石希露（Olga）、「變面謝安琪」趙詠瑤（Kimi）、「紋身姚子羚」譚凱倫（Helen）同健身教練姜珮琪（Bella），日前出海同陽光玩遊戲，佢哋將噴血泳衣相貼社交網，鬥晒火辣身材。
搵唔到巨胸翠如
擁34F巨咪嘅Olga盡騷big爆身材，噚日佢接受電話訪問：「幾好玩呀，不過好熱同好曬囉，大家冇話要鬥身材，因為真係好普通，諗住輕鬆去玩。」身材咁勁，係咪有信心入圍呢？佢話：「其實我冇乜嘢信心，覺得身材唔係優勝嘅地方，入到20強已經偷笑。」問到點解唔叫埋35F「巨胸翠如」鄧月平（Larine）出海？Olga話：「其實都想叫埋Larine㗎，不過真係冇佢聯絡電話囉。」
至於「變面謝安琪」Kimi剛被驚爆卵巢生瘤，佢喺電話度話：「我哋互相有唔同壓力，所以想出海散心傾吓心事，大家都冇佢（巨胸翠如）電話，問咗好多次，但佢話冇電話喎，所以一直約佢唔到，同埋睇報道見佢自己去咗沙灘，所以冇再約佢。」
撰文：馮仁昭
