80後嘅酒井裕介（Yusuke Sakai）同其他日本80後一樣，大學畢業後做白領，每日營營役役。酒井經歷5年高壓、工時長嘅白領生活後，激發佢創作出「憂鬱嘅白領男」相集。
酒井喺網站仲以簡單英文介紹番，日本白領族喺職場上嘅無力感。酒井裕介每張相只有一位穿上整齊西裝嘅白領男、揸住公事包趴喺大馬路、天台同停車場。作為打工仔，睇相後會回心一笑，體驗咩叫做到「趴喺度」，同時睇得出日本白領一族嘅悲歌。
日本白領族由「打工皇帝」變回「長期糧尾」，人工高、福利好，房屋同子女津貼費樣樣齊，原來已經係上世紀嘅事。樓市泡沫爆破，日本人都寧願租樓唔買樓。東京想買樓都係諗吓好，收入同樓價比例為10倍。換言之，白領一族唔食、唔玩同唔買嘢10年就可以喺東京置業。
首相安倍晉三早前揚言話要求企業最低工資加薪3%，由每粒鐘798日圓（約59港元）到822日圓（約61港元）。至於企業會唔會照跟加薪，相信對日本白領族嚟講總好過冇。日本白領男相對我哋港仔、港女更慳家。每個月洗費唔夠4萬Yen，即係3,000蚊都唔夠，平均食餐晏只用500幾Yen，50蚊港紙有找。終於明白點解日本白領男越來越多人要帶自家飯，因為落街去S字頭嗰間美式連鎖咖啡店買杯Venti嘅White Mocha都要520Yen，相當於一日嘅飯錢。突然覺得香港打工仔每朝喺茶記食個40幾蚊嘅早餐係好奢侈。
酒井裕介相集網：
https://rinse.io/s/salaryman-blues/AxAdgrZ
Captain Cool
https://www.facebook.com/seeforcaptain/
本欄逢周一刊出