【專訪】
由長和（001）創辦、往時為旗下樓盤提供按揭服務的財富管理公司尚乘集團（AMTD），引入瓴睿資本及中國民生投資成為股東後，被指染紅當年誠哥財仔旗艦。不過AMTD主席蔡志堅強調大股東仍是港資，未來會塑造AMTD成接國際大刁的港資投行，猶如當年紅籌之父梁伯韜創立的百富勤，「要令香港人覺得驕傲」。
曾任瑞銀、花旗投行高層的蔡志堅接受《蘋果》專訪時說，去年10月瓴睿聯同中民投入股AMTD，股權佔近七成，當中只有兩成屬中民投，故此港資金融專才成立的瓴睿屬大股東，長和僅餘4.4%股權。瓴睿首席執行官容顯文亦向本報稱，瓴睿骨幹都是海外或本地的香港人。
若走大眾化 沒有未來
AMTD自股權易手後，由針對零售客變為較高資產淨值客。蔡志堅說：「長和2003年成立AMTD後，從事投資管理、保險、按揭等，係新鴻基、耀才、英皇嗰種玩法，完全打零售。」但他認為本港市場細小，若走過往大眾化市場模式，成本吃重，AMTD會沒有未來。
蔡指AMTD未來會用「bulge bracket」（大型投行）模式，「一定要針對機構客，唔係話一定要針對200萬美元起跳客戶，其實中港兩地互聯互通後，好多資金沉澱咗喺香港，資產值80萬至150萬美元已經好多錢」。
若果沿用舊有模式，難服務這類資產值客戶，蔡志堅謂，投資產品不礙乎係新股、配股、發債，「喺一手市場入面，如果你係『叠上叠』嘅下家、三家、四家，股或者債熱嘅時候，你一定拎唔到貨；但唔熱嘅時候，你都係隔幾層先去買，又能唔能夠明白產品背後嘅優點，以為啲公司好差」。
AMTD過去半年在資本市場變得活躍，除了成為天津銀行（1578）、青島銀行（3866）等聯席簿記人，亦有積極參與配售債券及其他新股，「1億美金以上嘅deal，你幾時見過有港資？一間都無！除咗由我花旗時候嘅老師、梁伯韜先生當年創立嘅百富勤，港資投行你從來未見過會參與國際大型交易，we are the one and the only one（我們是唯一一間）」。
蔡志堅說：「我哋唔係想講畀人聽我哋幾叻，而係希望可以令港人都覺得驕傲，接通國內面向亞洲，接大刁嘅港資投行。」他亦稱，過去數年投行大部分由內地人主導，本地主修金融學生，畢業後選擇不多，「但如果你本身有個熟悉香港文化嘅投行，自然對佢哋發展空間係大嘅」。
管理資產逾15億美元
事實上，蔡志堅不停強調AMTD不止是一間投行，尚有資產管理及保險經紀業務，「前者係我哋嘅blood（主營業務），我哋已經超過咗15億美元，年底將會接近20億美元。至於保險經紀業務則會於明年上市，集團整體上市則須3年至5年時間，「仲要等埋內地個全證券業務牌照」。
記者：周家誠