近期好多機構搞新意思，轉logo、slogan，希望喺淡市中令人耳目一新。中銀人壽噚日亦公佈，即日起轉新商標，搵來著名書法家施子清題寫。
施子清乃施榮怡、施榮懷、施榮恒、施榮忻嘅爸爸，四兄弟除咗打理家族生意恒通資源之外，施榮懷係中華廠商聯合會永遠名譽會長，施榮忻有份創辦好多富二代參加嘅菁英會，施榮恒就做過東華主席，幾位成日見報，大哥施榮怡就相對低調。
施子清本身亦係本地商界「福建幫」嘅領軍人物，做過政協、全國政協文史和學習委員會副主任。施老近年醉心書法，不時舉辦展覽，作品有時會被拍賣籌款。
講番中銀人壽，佢哋除咗換商標，亦跟潮流，開facebook專頁，又推微電影，似乎想踢走老土感覺。