「黑帝」咸姆頓自從同歌手妮歌喺舊年結束七年情後，身邊嘅女伴有如走馬燈，分別傳出過同名模Petra Nemcova、Kendall Jenner、Barbara Palvin等傳過緋聞，不過，呢位F1世界冠軍似乎都係鍾情身材火辣嘅唱得之人，繼傳過同美國著名歌手Rihanna拍拖後，日前就被影到喺英國小天后歌手Rita Ora嘅香閏過夜。
31歲嘅咸姆頓同25歲嘅Rita Ora，喺早前F1英國站已經行得好埋，兩人之後喺網球手莎蓮娜嘅泳池party度仲玩得好放㖭！日前黑帝又被拍得喺Rita嘅倫敦寓所過夜，兩人仲喺第二朝前後腳離開㖭！據一名唔願意透露姓名嘅知情人士話：「其實黑帝同Rita早已撻着，而今次過夜就代表佢哋嘅關係更進一步囉！」
佢嘅前麥拿侖隊友畢頓，就似乎一條心得多。畢頓舊年年尾同日本超模太太道端謝茜嘉離婚，之後就火速戀上前《花花公子》兔女郎碧妮（Brittny Ward），兩人仲似乎越嚟越恩愛！
畢頓女友bikini不設防
碧妮日前喺社交網頁大晒玩水相，相中佢着嗰件比堅尼啲布少無可少，僅僅可以遮住重要部位，而且仲要係用透明膠帶綁住。嘩！唔怪得佢可以綁住畢頓個心啦！
