自從92年香港前馬王「翠河」打開本港馬匹遠征歷史新一頁後，本港馬遠征大大話話已有二十多年歷史，最高成就當然數到07年「爪皇凌雨」勝出杜拜司馬經典賽，成為世界馬王。近季則數到「友瑩格」，於15年先後勝出新加坡KrisFlyer國際短途錦標同埋日本高松宮紀念賽。
但唔知係咪外國好多大賽水準提高，又或者本地馬實力下降，上季咁多匹遠征港馬中，只係得一匹老馬「好好計」贏過杜拜泥地三級賽新達加短途錦標，其餘好似「幸福指數」、「大運財」等短途惡馬，遠征海外賽都只係跑位置啫。就連水準較弱嘅澳港盃，本港馬「好精神」亦不過跑第三。而且仲有「準備就緒」、「詠彩繽紛」遠征杜拜同日本都大敗，令人懷疑「月亮真係外國圓啲！」
不過唔緊要，香港始終仲有一大班肯花錢嘅馬主，亦有頂級練馬師同騎師，相信不久嘅將來，依然可以響世界馬壇分一杯羹。