周大福（1929）創辦人周至元兒子周樹堂上星期五介紹新業務，周大福老臣子何伯陶（陶叔）罕有現身撐場，十分畀面。呢位86歲老人家，15歲就入周大福工作，跟鄭裕彤老友鬼鬼，佢喺物業投資方面亦相當豪爽，市場估計佢有幾十億身家，實屬隱形富豪。
根據資料，陶叔2012年斥資5.5億元，買入彌敦道579號全幢商廈，舊年又一擲2,000萬元，掃入跑馬地壹鑾兩個單位，應該係投資老手。華華靜雞雞問陶叔最近有乜心水，有冇投資吓物業，佢就笑笑口咁耍手擰頭，果然係人老精，一把年紀仍然非常精靈，唔會亂講說話。
陶叔跟彤叔一樣都係順德人，年輕時加入周大福，學過會計，精於設計，最叻雕龍雕鳳，市傳周大福上市時，佢獲贈股份，因而有幾十億身家㗎。