增強實境手機遊戲《Pokémon GO》熱潮席捲全球，唔止玩家等到頸都長，連「財爺」曾俊華都有留意，喺最新網誌入面就提及呢款遊戲，話好佩服開發商任天堂嘅創意，令玩家耳目一新。不過財爺讚人哋，並非想叫學生多啲研發創新遊戲，而係為抽水。
佢順手又推銷佢近年至愛嘅金融科技（Fintech）。佢話，科技帶動經濟，最重要係可以「應用」，否則就算有最尖端同顛覆性嘅科技，只可以「束之高閣，擱在一旁」，所以要了解實際環境同自身優勢，利用科技發展經濟。講咁多，佢都係想講點樣用新科技推動香港在金融業啫。
一講到Fintech，佢又再推銷之前喺《財政預算案》講過嘅區塊鏈（Blockchain）技術，話有好高潛力，例如銀行可以用Blockchain資料庫了解客戶背景、過去融資同按揭紀錄，避免早前出現詐騙銀行嘅案件。
財爺仲話，更多金融科技應用推出，會「帶領我們進入Fintech的大時代」喎。