七月八日晚，到君悅酒店參加「香港賽馬會冠軍人馬獎頒獎禮」，是晚有兩個獎未知花落誰家，就是「最受歡迎騎師獎」和「告東尼獎」，須待七月十日本年度馬季（2015/16）最後一天賽事之後才知鹿死誰手。
「告東尼獎」係一個新獎項，第一次頒發，呢個獎好有意思，馬會能夠諗出以「告東尼」為名，值得一讚。凡係馬迷，當然知道告東尼係邊位，左丁山第一次聽到告東尼名字，已是做銀行見習生之時，銀行分行經理經常講起告東尼、羅國洲，知道佢地係馬會第一屆騎師訓練班教出嚟嘅紅牌騎師，迅速走紅，告東尼較羅國洲更勝一籌，之後成為本港冠軍騎師，與摩加利分庭抗禮，再衝出香港，到法國策騎，在歐洲闖出名堂，為香港賽馬增光，跟住回流香港做練馬師，成功訓練馬王「精英大師」，攞過兩次練馬師冠軍，佢由1970年（14歲）加入訓練班至今，縱橫馬圈46年，成就非凡，雖然係葡萄牙人，但在香港土生土長，百分百由本港馬會培養成才，冇人會反對佢做香港馬圈最佳代表。
馬會為鼓勵新生代本土騎師力爭上游，從今季開始頒發「告東尼獎」俾贏馬次數最多嘅本地騎師，好有勵志作用，告東尼係本地最成功嘅馬圈故事，早已成為有志習騎，成為騎師嘅年青人嘅偶像，今年有兩位爭奪，就係梁家俊與蔣嘉琦。梁家俊在頒獎晚會上，話能夠爭得告東尼獎嘅話，係莫大光榮，可惜佢在7月10日之前仍然落後俾蔣嘉琦，幾難在最後一個賽馬日反先。
第一屆「告東尼獎」得獎人非蔣嘉琦莫屬，記得佢在季中受傷，休息一段時間，點知復出後，成績突飛猛進，成為人氣急升騎師，究竟有何原因？蔣小妹話右手受傷休息時，佢仍然堅持騎上木馬練習，天生右手唔用得，就逼自己用左手用鞭及推騎，結果練成左右手一樣咁有力，咁靈活，復出後出賽，自覺騎馬可左右開弓，於是信心大增，贏馬次數急升。有人受傷自覺陷於低潮，蔣小妹受傷，就利用訓練改善自己弱點，得到大進步，今年24歲，仍有大幅度進步空間，成為告東尼第二，或者難啲，但目前可與本地男騎師一爭雄長，今季取得「告東尼獎」及「最受歡迎騎師」榮銜，下季更加人氣爆燈。