祖雲達斯今個月30號喺香港大球場友賽南華，一如所料，祖記嚟遠東嘅陣容冇乜星味，保方、保羅普巴、基迪拉等國腳仲放緊大假，但好在祖記早排簽咗兩個有啲名氣嘅新兵，分別係中場比真歷同埋中堅貝拿迪亞。兩位新兵都會隨隊訪港，同埋阿根廷前鋒保羅戴巴拿一齊孭飛，對南華門票至今售出四千張。
祖記噚日朝早起程，先飛去澳洲嘅墨爾本，開展佢哋嘅季前遠東之旅。祖記公佈嘅25人大軍名單之中，有一半都係青年軍小將，其餘大部份係一隊嘅副選。我求大俠認為當中三個球星最有睇頭，分別係保羅戴巴拿、比真歷同貝拿迪亞。戴巴拿喺上季意甲入咗19球，排射手榜次席，僅次拿玻里前鋒希古恩，亦係祖記嘅頭號射手，之前都傳過巴塞隆拿想斟佢。
羅馬兩舊將爭表現
至於比真歷都好出名㗎，呢位波斯尼亞中場喺里昂出道，射罰球有一手，近幾季喺羅馬表現都非常好，所以今夏就被祖記睇中，以3,200萬歐元加盟。佢話好鍾意施丹，所以揀咗5號球衣喎，但我求大俠覺得怪怪地，施丹係過咗皇家馬德里之後先着5號㗎喎，唔通比真歷都好恨去皇馬？
另外，雖然祖記成條正選防線都未歸隊，但都有位重量級人馬，就係啱啱由拜仁慕尼黑外借加盟嘅貝拿迪亞。佢之前喺意甲都打滾過幾年，13/14球季喺羅馬踢得非常好，之後轉投拜仁，可惜喺拜仁成日傷，踢唔番水準，所以今夏返意甲踢祖記。
26號對完熱刺後來港
29歲嘅貝拿迪亞話：「返意甲踢祖記係個合理嘅決定，希望呢季繼續幫祖記稱霸意甲，問鼎歐洲錦標。我適應到四人後防或者三中堅嘅戰術，可以喺任何時候都幫到球隊。」佢仲好期待同前羅馬隊友比真歷重逢，「比真歷同我好老友，佢係個好球員，好開心亦好幸運可以同佢再做隊友。」而祖記喺墨爾本會踢兩場波，先喺23號對墨爾本勝利，之後喺26號對熱刺，踢完呢兩場就會到香港，喺30號對南華。
