社民連長毛星期四喺立法會大會就醫生註冊條例發言時，狂鬧保皇黨盲撐政府提出嘅條例、卻唔肯支持公民黨郭家麒提出嘅修訂，熄咪期間仲同民記「元秋」蔣麗芸口角，差啲畀代主席梁君彥雙雙逐出會議廳。
元秋離開會議廳後，見長毛同葉建源傾偈，即時衝上前大嗌：「我啲眼耳口鼻係真嘅，你尊重吓我！」長毛就笑指：「你使乜咁緊張？ 我話你靚咋嘛！我為你著想，話投咗畀游蕙禎唔抵咋嘛!」元秋聞言後更嬲，谷住道氣大鬧：「我化咗妝呀，我宜家無化妝咋！你投畀游蕙禎啦，投畀你心目中嘅貞子！」
見到元秋咁嬲，長毛身旁嘅運房局副局長邱誠武同葉建源卻喺度笑笑口，長毛呆一呆問道：「我有講錯咩？」之後就同元秋一齊入立法會前廳。
八方之後問元秋，長毛講咗乜嘢關於佢個樣時，佢拒絕多談，只稱自己今次咁嬲，係因為長毛會上嘅言論，有侮辱女性之嫌，叫八方問番長毛！長毛就話，原來佢攞到張元秋嘅單張，發現佢「面目全非」，靚咗好多，擔心選民會誤會係游蕙禎，投錯票咁話喎。