噚日收爐嘅立法會大會，可算今屆會期最和諧嘅一日，議員雖然喺議事廳內繼續就《醫生註冊條例》拉布對陣，但議事廳外就不停有散水餅、兼有告別議員向女士送花，皆因係last day，唔少人都依依不捨，場面相當溫馨。
其中喺特首答問大會因怒丟梁振英政綱、以及不滿對方hea答而離場抗議嘅工聯會郭偉強（圖），特別以學生look現身，打咗那些年喺香港華仁讀書嘅校呔。點解咁有feel？乜佢都告別議會？近期大改形象變身潮童強嘅佢話喎，last day好有學生嘅感覺，所以變番學生哥，但佢笑笑口自嘲：「但係好得意，我今次係爭取留班（連任）！」