距離里約熱內盧奧運揭幕只剩20日，當地著名紅燈區Vila Mimosa唔少妓女亦準備就緒，計劃減價「促銷」，務求吸引更多外地旅客同選手幫襯，趁機賺番啲生活費咁話！
明碼實價100港元有找
作為巴西最大同歷史最悠久嘅紅燈區，去到Vila Mimosa或者可以體驗到古代皇帝嘅生活，因為呢度有「後宮佳麗三千」，唔同身型、國籍嘅妓女都有，至於質素係點就見仁見智啦。呢班姐姐仔吸取過2014世界盃無人問津嘅慘痛經驗，加上最近巴西經濟不景，於是決定減價搶客。佢哋仲特登用英文整咗本「餐牌」出嚟，明碼實價咁列出唔同服務嘅收費，平時30分鐘服務收75雷亞爾（約180港元），𠵱家只需40雷亞爾（約95港元）就有交易。
吸取世盃拍烏蠅教訓
現年39歲、做咗呢行12年嘅艾蓮（Aline Docinha）向英國《每日郵報》透露：「巴西舉辦世界盃期間，我哋擺晒啲大螢幕喺條街度直播比賽，又整吓巴西烤肉同播音樂，都吸引唔到啲人幫襯！我懷疑啲外國遊客唔夠膽嚟，因為呢個紅燈區唔近沙灘同酒店，同埋佢哋可能驚污糟啦。」即使有來自阿根廷或者烏拉圭嘅客人上門，但佢哋都會諗盡辦法壓價；而巴西當地嘅男人，就似乎對足球比賽更有興趣。Aline仲話：「𠵱家紅燈區就好似超市減價促銷咁，希望大家睇奧運之餘，都會抽啲時間幫襯啦。」
至於同樣係39歲嘅姬比娜（Gabriela Alves）就話自己係被迫入行，因為巴西經濟實在太差，佢希望每日賺到250雷亞爾維持生計：「我全屋人都靠我搵食。雖然佢哋唔鍾意我做呢行，但都冇計！而且我哋競爭都好大㗎，因為好多新入行嘅妓女為咗賺錢，甚至准啲客人唔戴套。」