馬刺周四公佈同效忠咗14季嘅真路比利（Manu Ginobili）續約一年！有消息指76人曾經開出一紙兩年總值3,000萬美元（約2.3億港元）嘅合約，撬呢位最佳第六人過檔，逼使馬刺要向佢加薪；美國《ESPN》就透露，球隊今次開出1,400萬（約1.1億港元）年薪同呢位38歲老將續約。馬刺同日亦宣佈簽入加素（Pau Gasol），據悉「銀黑兵團」會用3,000萬美元同呢位36歲中鋒簽約兩年，頂替鄧肯（Tim Duncan）退役後嘅空缺。至於40歲嘅鄧肯退役後開始享受人生，佢喺周四同老友Rash Clenance去釣魚嗰陣，表情勁浮誇咁指住條魚餌，扮係啱啱釣上嚟嘅大魚，似乎玩得勁開心。