本土派近年喺香港迅速冒起，但當中都有勇武同務實派，其中新界東立法會議員、新民主同盟范國威，可算係後者嘅代言人之一，7月書展仲會推出新書《務實本土》，原來係想大家睇完本書，清楚明白知道佢主張嘅本土，同民記Tree根、自由黨李梓敬同標榜勇武的本土組織有乜分別。
唔知主張不要分離嘅愛國本土派Tree根、因反對新移民攞綜援而被高登仔封為建制本土嘅李梓敬，以及魚蛋起革命嘅勇武本土派，對於務實派咖喱范抽水又點睇？
設計作品晒冷
單睇Gary新書個序，已經好有睇頭，皆因有民主黨創黨主席李柱銘及Gary范嘅中學老師韓連山幫手寫序。Gary話書中有相信係全政界中，只有佢會寫嘅章節，係就「政治美學」。
大學修讀視學藝畢業嘅Gary話，因為幫過唔少政黨同民間組織設計宣傳品，所以唔少人封佢為「社運設計師」，佢最滿意嘅設計係2005年嘅「普選火鳳凰」標誌，話呢個設計係惡搞當年政府豪花900萬公帑sell香港嘅飛龍標誌，當年唔少T恤、貼紙同頸鏈都印有呢個logo，相信唔少港人仲記得。
而佢最難忘係早前「拒絕香港赤化」嘅「潑紅油」廣告，原來Gary拍攝前要準備四件衫，先潑兩次水測試拍攝效果，其後先用水溶紅色顏料嚟潑，當然有唔少入咗眼，都咪話唔搏命。
曾係白鴿黨員嘅Gary，2007年又整咗幅以白鴿黨員肖像為藍本嘅漫畫（小圖），呼籲市民登記做選民。睇見相中人分道揚鑣，都咪話唔欷歔，唔知大家又認得幾個？
李八方
mailto:[email protected]
