曾任廉署調查主任嘅白鴿黨林卓廷（圖），最近多次引述廉署內部消息，質疑廉署一姐李寶蘭被取消署任嘅決定同梁振英有關後，大批梁粉包括潘麗瓊及屈穎妍，以及《文匯》同《大公》等左報近日瘋狂圍攻佢，仲有人話佢唔係廉署高層，所以不能評論事件。
面對狙擊，阿廷喺fb出文反寸：「如果咁嘅邏輯成立，咁咪全世界都唔評論得梁振英，除咗董建華同曾蔭權？」阿廷對住呢班梁粉真係冇有怕，繼續為廉署人員發聲，佢話內部對一姐事件非常憤慨，搵佢爆料合情合理，不滿CY至今都冇否認過佢提出嘅質疑，而佢踢爆有廉署首席調查主任辭職，以及廉署周年晚宴因大量人員拒絕出席而取消，兩單消息如今證明係堅，呼籲梁粉同圍攻者，不如叫CY解釋點解做特首仲要收UGL五千萬好過。