到陸羽午茶，見到立法會主席曾鈺成笑笑口咁行上三樓參加左派傳媒元老嘅慣常飯局，呢個飯局以前一個星期一次，好似年幾前開始，就改為一個月一次，主力台柱有李子誦、吳康民等，李子誦已經仙遊，近年又見有以前香港電台啲高層邵盧善、張圭陽、梁家永入座，至於曾主席可能因為事務繁忙，只係偶爾出現。
點解立法會開會期間，曾主席會有時間走上陸羽呢？仲有茶客叫幾聲：「曾特首去馬」㖭，怕唔會喇啩，冇理由梁生之前有個曾特首，之後又有個曾特首嘅啫；立即用手機上網睇吓立法會新聞，原來上午已二讀通過醫生註冊條例（修訂），立法會下午休會，唔怪得曾主席可以輕輕鬆鬆到陸羽與一班老愛國食番餐。
同座醫生C聽到二讀通過醫委會條例，略有失望表情，但即刻話：「都係幾難阻止通過嘅，梁家騮一人拉布，立法會內缺乏支持，冇乜好講。」跟住佢又話2012年特首競選之時，好多醫生支持梁振英，反唐英年，醫學界選委幾乎一面倒（聽話也好，自願也好）咁投票俾梁振英，其實抬轎有功。呵呵，眨吓眼又快到2017，你估啲醫生仲會唔會投票俾梁振英呢？醫生C話：「我唔係選委，唔識答，你去問蔡堅、周伯展。」
左丁山對事不對人，認為張宇人當初要提出私人條例改革醫委會，有其道理，後來特區政府驚住開先例，攞番嚟由政府提出，現在既然已經二讀通過，梁家騮以後唔繼續玩嘢嘅話，三讀通過理應OK啦。醫生界反對有兩大點理由，第一點係反梁，唔信佢，純粹係對人不對事，第二點係反對大陸醫生，唔想開放門戶讓大陸醫生可以比較輕易來港行醫，但講到明就恐怕成為歧視祖國大學，醫生唔敢因而大聲疾呼。其實呢樣嘢香港可以向新加坡抄橋，人地每年不停輸入醫生，又唔見話甚麼醫療水平下跌等廢話，總之行事公正，按世界醫科大學聲譽排名嘅話，容許Top 100（全世界最佳100名醫學院）畢業生及已經在當地註冊嘅醫生來港執業，有乜唔妥呀？新加坡大學現時排名亞洲第一，佢醫科生不能來港註冊，反而港大中大醫科畢業生可以去新加坡行醫，根本冇乜道理，他日即使有哈佛牛津醫生回港，又有廣州暨南大學醫生開業，咪等市場決定邊一位醫生有病人幫襯囉。