大家仲記唔記得邊個叫做蔣任宏？冇錯嘞，就係去年卸任嘅個人資料私隱專員嘞。65歲嘅佢最近有新搞作，日前向法庭申請成為大律師，有關程序本月底進行。
蔣任宏出任私隱專員前任職多個政府部門，曾出任郵政署署長，2006年退休。似乎佢都係退而不休嘅人嚟㗎喎，因為佢之後就喺香港大學修讀法律課程，其後獲聘為私隱專員。
而佢出任私隱專員期間，最受關注兼出位作係同商務及經濟發展局開拖。話說當時佢發表網誌，公佈「人對人」直銷電話嘅公眾意見調查外，仲建議當局作出規管喎，點知由蘇錦樑任局長嘅商經局，對於佢以咁樣嘅方式公佈調查報告覺得失望同不滿，認為公署應事先同商經局溝通，嬲到爆嘅蔣任宏主動還擊，斥當局應該責無旁貸咁跟進。