𠵱家香港咁亂，專欄作家兼退休老師韓連山特別引經據典，借題發揮，教人講粗口鬧人都要懶文雅。
韓連山話香港𠵱家慘不忍睹，但佢唔係專業評論員，惟有做番老本行，借莎翁過橋，教英文鬧吓人。咁啱撞正莎翁逝世400周年，韓連山趁機出版兩冊《莎士比亞罵人的藝術》，中英對照，講古仔兼寸高官！
莎翁原來好鍾意鬧人，韓連山話莎翁有先見之明，句句都好啱𠵱家嘅香港，例如見親梁振英就諗起《Macbeth》嗰句「Fit to govern? No, not to live」，即係叫佢去死；《Henry VI Part 2》一句「Die, damned wretch, the curse of her that bare thee」仲正，意思係「你這壞蛋死吧，養出你這壞蛋的婆娘也得到報應」，問候埋人哋娘親，韓連山哈哈笑：「真係講粗口㗎！」
韓話自己本書屬自癒系，寫得好爽。除咗鬧人，仲想做埋教材，幫下讀Eng. Lit.嘅學生學以致用。