立法會收爐前，社民連梁國雄同民建聯蔣麗芸呢對冤家，又喺立法會開拖，仲要關青年新政游蕙禎事？冇理由兩女爭一男啩？噚日長毛喺立法會大會就《醫生註冊條例》發言時，狂鬧保皇黨盲撐政府、唔支持公民黨郭家麒提出嘅修訂，熄咪期間仲同元秋口角，差啲俾代主席梁君彥雙雙逐出會議廳。
稱僅執頸紋
元秋離開會議廳後，見長毛同葉建源傾偈，即時衝上前大嗌：「我啲眼耳口鼻係真嘅，你尊重吓我！」長毛就笑指：「你使乜咁緊張？ 我話你靚咋嘛！我為你着想，話投咗畀游蕙禎唔抵咋嘛！」元秋聞言更嬲，谷住道氣大鬧：「我化咗妝呀，我𠵱家冇化妝咋！你投畀游蕙禎啦，投畀你心目中嘅貞子！」旁邊嘅運房局副局長邱誠武同葉建源喺度笑笑口，長毛呆一呆問道：「我有講錯咩？」之後就同元秋一齊入前廳。
八方問番元秋，長毛講咗乜嘢關於佢個樣時，佢拒絕多談，只稱自己今次咁嬲，係因為長毛會上嘅言論，有侮辱女性之嫌，叫八方問番長毛！
長毛解畫，話因為佢笑元秋嗰張選舉單張「執」得太緊要，搞到元秋個樣好靚好後生，「認佢唔到咁滯」、「好似返老還童」，「我同佢講，話佢將單張整到咁樣，如果啲人睇完，投咗畀游蕙禎，咁咪大件事？」元秋堅稱自己貨真價實，傳單個樣全部堅嘢：「嗰日我化咗妝係好靚㗎，我好上妝㗎，係啲頸紋人哋幫我冇咗之嘛，冇乜其他嘢啦！」
又咁講，查實元秋點靚法，都同游蕙禎唔似樣啩？蕙禎BB睇到反而係應該嬲嬲豬？
李八方
mailto:[email protected]
