歐國盃完咗，呢屆賽事對球壇未來發展有咩啟示？小弟睇到兩點，第一係放下身段者勝，太多控球冇益；第二係中鋒好有用，求其搵個大隻佬企喺最前，好過踢多個細細粒中場。
控球係王道，呢個講法喺巴塞隆拿同西班牙鼎盛嗰幾年，基本上冇人質疑，仲引嚟好多球隊去抄。到呢兩年，我哋開始發覺，控球係王道有個前提，就係要有個沙維。足球冇最強嘅戰術，只有最適合嘅戰術；有沙維，巴塞同西班牙可以將控球玩到天下無敵，但一冇沙維，控球威力大打折扣。巴塞靠尼馬、蘇亞雷斯同拿傑迪錫嘅活力，去加強前場逼搶，同時放棄一啲控球時間，慢慢轉型；西班牙嘅踢法就冇大變，將恩尼斯達當沙維用，但小白嘅防守貢獻唔夠當年沙維多，加埋又冇咗沙比阿朗素，結果效果差得遠。家陣西班牙得小白勉強做到控球指揮官呢個角色，但佢都老嘞，西班牙係時候搵過一條新路。控球係需要好強嘅球員去支持，傳球獨到得嚟又唔容許成日犯錯，用得好係好勁，但好難用得好；防守反擊就相反，對球員能力同團隊默契嘅要求較低，容易踢得好。
之後講吓中鋒，近年球壇少咗好多牛高馬大嘅中鋒，而興起美斯同C朗嗰款可鋒可翼嘅前場自由人，配合埋天才橫溢嘅中場，中前場穿花蝴蝶咁走位，諗起都正。不過，要做到實在太難，不如老老實實搵個大隻佬企喺最前做橋頭堡，衝散對手中堅。好似決賽咁，葡萄牙搵艾達盧比斯入嚟踢中鋒，成隊進攻即刻生晒，佢仲入埋波做英雄。另一個例子，小弟之前都講過，就係德國，初頭用馬里奧葛斯打無鋒，最後玩唔掂，都係搵馬里奧高美斯踢中鋒好用。
文：咖喱