本版動新聞經常向港產爛片致敬，周日歐國盃決賽又係法國，又係聖但尼球場，自不然聯想到《賭俠1999》化骨龍扮朗拿度拍片改變戰果呃馬交文條橋。巴西前鋒朗拿度喺98世盃決賽踢到隱晒形，搞到法國大勝3:0；咁啱呢場歐國盃決賽，葡萄牙個C朗踢咗25分鐘就傷出，唔通化骨龍又搞嘢？不過，葡萄牙冇C朗一樣掂，加時由艾達盧比斯絕殺法國首奪大賽冠軍。
戰友咖喱想講前鋒抬頭。講起98世界盃，作為法國球迷嘅小弟，自不然要回憶番當年俾朋友笑法國前鋒廢，古華治同杜加里兩個柱躉都係空有身材而冇乜射術，搞到球隊踏入淘汰賽已經冇前鋒入波；好彩到2000年歐國盃，法國鋒線反而出現人滿之患，亨利同查斯古特冒起，韋托特做埋後備英雄，都幾夠照。
講真，今時今日法國前鋒質素真係唔差。或者大家都批評「銀河唯一」基奧特又慢又把握力差，其實如果佢轉籍去葡萄牙，C朗應該好開心；賓施馬賽前因為「勒索門」被逐出國家隊，最搞笑係法國足總又出嚟講其實冇罰過呢位皇馬前鋒停賽，暗示佢喺世界盃外圍賽會重返國家隊。查實就算冇賓施馬，其他前鋒都幾好份量，好似里昂前法甲神射手拿卡錫迪、幫西維爾贏歐霸盃嘅加美路等。可惜教練迪甘斯為咗畀「契仔」基格納有後備上陣機會而唔揀佢兩位，又唔重用曼聯新星安東尼馬迪爾，難怪曼聯球迷狂寸迪帥，話決賽啲飛蛾喺球場嘅時間仲多過馬迪爾。
世界潮流成日轉，之前翼鋒興起，C朗、美斯同尼馬都係勝利關鍵，但有好嘅正前鋒，戰術上始終彈性得多。迪甘斯今次瀨嘢，應該學精咗啩，唔好再信大而無當嘅基格納。
文：牽牛